கோடாலித் தைலம் கொண்டு வா

கோடாலித் தைலம் கொண்டு வா

பட்டணம் விட்டு ஊருக்குத் திரும்புவது நல்ல விசயம்

நிறைய பாலங்கள் இருக்கின்றன

ஆற்றில் தண்ணீர்தான் ம்ஹூம்

காம்பளக்ஸ்கள் விரவிக் கிடக்கின்றன

வயல்கள் எங்கே போய்த் தொலைந்தனவோ

டாஸ்மாக் பாரில் குடித்துக் கொண்டிருக்கிறார்கள்

பெண்டு பிள்ளைகள் தண்ணீருக்காக

தவளையைத் தலையில் சுமந்தபடி அலைந்து கொண்டிருக்கிறார்கள்

அங்கங்கே ப்ளாட்டுக்கான கற்கள் அடிக்கப்பட்டிருக்கின்றன

சிறுவர் கிரிக்கெட் விளையாடிக் கொண்டிருக்கிறார்கள்

செவத்தக்காவின் எட்டு எருமைகள் செத்து விட்டன போலும்

பன்றிக்குட்டிகள் குறுக்கும் மறுக்குமாக ஓடுகின்றன

வழக்கமாக வீட்டுக்கு வந்ததும் லோட்டாவில்

தண்ணீரை நீட்டும் அம்மா

இன்னும் கேன் வாட்டர் வரவில்லை என்கிறாள்

மினரல் வாட்டர் விளம்பரம் டி.வி.யில் ஓடிக் கொண்டிருக்கிறது

வழக்கமாக இப்படி இளைச்சுட்டியே என்பவள்

சீரியல்லாம் பார்க்குறீயாடா என்கிறாள்

அம்மாவிடம் கோடாலித் தைலம் இருந்தால் கொண்டு வா என்கிறேன்

*****