பெயர் தெரியாத மனிதர்

பெயர் தெரியாத மனிதர்

பெயர் தெரியாத மரங்கள்

சாமரம் வீசுகின்றன

பெயர் தெரியாத பறவைகள்

கானம் இசைக்கின்றன

பெயர் தெரியாத காடு

பசி போக்குகின்றது

பெயர் தெரியாத  மலை

உச்சியில் ஏற்றுகிறது

பெயர் தெரியாத வானம்

நட்சத்திரங்களைத் தூவுகிறது

எந்த ஆண்டு எந்த மாதம் எந்த வாரம்

என்ற எண்ணிக்கையின் பெயர் தெரியாத

இந்த நாளில்

பெயர் தெரியாத இந்த மனிதரை

அகதியெனப் பெயர் சூட்டி

பெயரிடப்பட்ட ஒரு நாட்டுக்குள்

உள்நுழைய வற்புறுத்தாதீர்கள்

*****

வளர்ச்சி

இந்த விடுமுறையிலாவது

குழந்தைகளை

சும்மா இருக்க விடுங்கள்

அவர்கள்

கொஞ்சம் வளரட்டும்

வெற்றிடம் இருந்தால்தான்

திணிப்பதற்கு இடம் கிடைக்கும்

இல்லாத இடத்தில்

எம்மரங்கள் கிளை நீட்டும்

*****