கிறுக்குப் பாம்பு பழி வாங்கும் பாம்பு

 

கிறுக்குப் பாம்பு பழி வாங்கும் பாம்பு

இது உன் கடைசி கையெழுத்து என்றால்

முதல் கையெழுத்தின் ஞாபகம் உனக்கிருக்கும்

இடையில் போட்ட கையெழுத்துகளை

எத்தனை என்று எண்ணியிருப்பாயா

இடிந்து விழுந்த கட்டடத்துக்காக

உடைந்த விழுந்த பாலத்துக்காக

செயற்கை மரணத்தை

இயற்கை மரணமென்று காட்ட

கட்டாத கழிவறைகளுக்காகப் போட்ட

கையெழுத்துகளின் துர்வாடை கேட்கிறதா

கடைசி கையெழுத்து

பாவ விருட்சமாய் முளைவிடுவது தெரிகிறதா

கிறுக்கலான கையெழுத்து வழி ஓடும்

பழிவாங்கும் நச்சுப் பாம்பு

துரத்தத் தொடங்கி விட்டது

கையெழுத்திட்டப் பேனாக்கள் ஓடி விட்டன

நீ மாட்டிக் கொண்டாய்

*****