அதிகாரக் கிருமிகள்

 

இயல்பை அறிய முடியாது

இயல்பாக இருப்பதில் எல்லாம் இருக்கிறது

இயல்பை மாற்றிக் கொள்வதில் என்ன இருக்கிறது

கோபம் உன் இயல்பென்றால் கோபப்படு

புன்னகை உன் இயல்பென்றால் புன்னகை செய்

எது உன் இயல்போ அதில் இருப்பாய்

உலகம் உன்னை அப்படி இருக்க விடாது

உலகத்துக்காக நீயும் அப்படி இருக்க மாட்டாய்

உலகம் உன்னை மாற்றியதோ

உலகுக்காக நீ மாறினாயோ

இயல்பில் இருப்பதை நீ அறிய முடியாது

நீ இருப்பதை நீ அறிய முடிந்தால்

இயல்பில் நீ இல்லை என்பதை அறிந்து கொள்

*****

அதிகாரக் கிருமிகள்

உன் சின்ன அதிகாரத்தில்

வீட்டை மிரட்டுவாய்

கொஞ்சம் பெரிதானால்

ஊரை மிரட்டுவாய்

இன்னும் கொஞ்சம் பெரிதானால்

வட்டாரத்தை மிரட்டுவாய்

மிகப் பெரிதானால்

நாட்டை மிரட்டுவாய்

உலகை மிரட்டுவாய்

நீ அப்படித்தான் இருக்கப் போகிறாய்

பெரிய பதவியில் இருந்தாலென்ன

சாமன்யனாக இருந்தாலென்ன

கொலையில் சின்ன கொலையென்ன

பெரிய கொலையென்ன

கிருமி போலிருந்தென்ன

டைனோசர் போலிருந்தென்ன

அதிகாரம் வதைக்கும்

*****