பிரி சொற்கள்

 

பிரி சொற்கள்

இணைந்திருப்பதைச் சொற்கள் பிரிக்கின்றன

வடக்கென்றும் தெற்கென்றும்

சொல் உண்டானப் பிறகு

ஒன்றென இருந்த நிலம் இரண்டெனப் பிரிகிறது

கிழக்கென்றும் மேற்கென்றும்

சொல் உண்டானப் பிறகு

ஒன்றென இருந்த தெரு இரண்டெனப் பிரிகிறது

ஒவ்வொரு புள்ளியும்

முதற் புள்ளியும் முடிவுப் புள்ளியுமாகும் வட்டத்துக்கு

சொல் உண்டானப் பிறகு

துவக்கப் புள்ளியும் இறுதிப் புள்ளியும் முடிவாகிறது

சிந்தாத மழையும் மொழியும்

ஏன் சிதறப் போகிறது

பிரித்து எழுதும் சில சொற்களில்

எழுத்துகள் கூடுவதைப் பார்த்து

பிரிக்கப் பார்க்கின்றன சொற்கள்

சேர்த்து எழுதும் சில சொற்களில்

எழுத்துகள் குறைவதைப் பார்த்து

சேர்ப்பதைத் தடுக்கின்றன சொற்கள்

ஒற்றை நாக்கு சொல் வீசினால்

இரண்டு துண்டாகிறது வாழ்க்கை

*****