நூற்றாண்டுகளை நொறுக்கும் கேள்வி

உம் மலத்தை அள்ளுவது

எம் வேலையாயிற்று

உம் காலணியைத் தைப்பது

எம் தொழிலாயிற்று

உம் காலில் விழுவது

எம் வழக்கமாயிற்று

உம் நாறும் உள்ளாடைகள் வரைத் துவைப்பது

எம் பழக்கமாயிற்று

உம்மிடம் உதைகள் வாங்குவது

எம் நாகரிகம் ஆயிற்று

உம்மிடமிருந்து அடிகள் விழுவது

எம் கலாச்சாரம் ஆயிற்று

உம்மிடமிருந்து நாராசச் சொற்களைப் பொறுப்பது

எம் பண்பாடு ஆயிற்று

உம்மை எதிர்த்து ஒரு கேள்வி

ஒரே ஒரு கேள்வி

அது எம் நூற்றாண்டு கனா ஆயிற்று

ஒரு கேள்வி ஒரே ஒரு கேள்வி

நூற்றாண்டுகளை

அடித்து நொறுக்கும் என்பதை

நீ

கேள்விபட்டிருக்க மாட்டாய்

*****