கடல் அதே கடல்

கடல் அதே கடல்

ஒரு காலத்தில் நிறைய முத்துகளை அள்ளினார்கள்

உப்பை மூட்டை மூட்டையாய் இறைத்து எடுத்தார்கள்

மீன்களைக் கொத்துக் கொத்தாய்க் கொள்ளையடித்தார்கள்

காலம் மாறி விட்டது

இப்போது கொடுக்கின்ற நேரம்

கதிர் வீச்சுக் கனநீரை கலந்து விடுகிறார்கள்

கழிவுகளை அடைத்து நடுக்கடலில் வீசுகிறார்கள்

சாக்கடை நதிகளை திசை மாற்றி விடுகிறார்கள்

உப்புக் கடல் தப்புக் கடலாகி விட்டது

மீன்கள் புற்றுநோய் வந்து அலைகின்றன

முத்துகள் நோய்க் கட்டிகளாகி விட்டன

கடல் அதே கடல்தான்

கடலை இமயமாகவோ

இமயத்தைக் கடலாகவோ

இடம் மாற்றிக் கொள்ளும் அப்போதும்

கடல் அதே கடல்தான்

மனிதர்கள் அப்போது வேறு மனிதர்கள்

*****