மரணம் வழங்கும் பிதாக்கள்

பூச்செடிகளின் மேல் ஏறிச் சென்ற

போர் வாகனத்தை

காறித் துப்ப வேண்டும்

குழந்தையின் கன்னக் குழியில் வெடித்த

இயந்திரத் துப்பாக்கியை

ச்சீ ச்சீ ச்சீ என இழிவு செய்ய வேண்டும்

கேளிக்கை மைதானங்களில் புதைக்கப்பட்ட

கண்ணி வெடிகளை

சீக்குச் சிந்தனைப் பிடித்தவர்களின்

மண்டையோட்டில் புதைக்க வேண்டும்

பள்ளம் நோக்கி விழுந்து கொண்டிருக்கும்

குரல் கேட்கிறதா

கேட்க முடியாத வெகு ஆழத்துக்குச் சென்று விட்டதா

வெடிப்புகளின் ஒலியில்

தீனக் குரலாய் அழியப் போகிறதா

செவியறுந்து விழுந்து விட்டது என்றால்

வைக்கப்பட்ட கோரிக்கைக் குரலுக்காக

மன்னிப்பும் மரணமும் வழங்கப்படுவதாக

*****