நீங்களே பாருங்கள்! வாழ்வெனும் இக்கோப்பை
எப்போதும் காலியாக இருக்கிறது! அடியில் ஆசையெனும் ஓட்டை கோப்பையை நிரம்பவே விடுவதில்லை.
*****
"சர்தாம் போடா!" என்கிறார்
தெக்குடு தாத்தா! சரிதான் என்று போகிறார்கள் எதுவும் சொல்லாமல். இதயத்திலிருந்து
வரும் வார்த்தைகளுக்குக் கீழ்படிவதைத் தவிர வேறு வழி?!
*****
மாபெரும் மகான்கள் தங்கள் மனதைக் கொடுக்கத்தான்
பிரியப்படுகிறார்கள். நாமோ அவர்களின் உடலை வாங்கி ஜீவசமாதி வைப்பதோடு திருப்தி அடைந்து
விடுகிறோம். பாவம் மகான்கள்!
*****
சாவை அறிவித்து ஆகப் போவதென்ன? அது நிச்சயம்
நிகழப் போவது. நிகழ்ந்து விட்டுப் போகட்டும். சொல்லி விட்டு விடைபெற வேண்டும் என்ற
சடங்குகள் சாவுக்குப் பொருந்தாது. சாவுக்குச் சடங்குகளே பொருந்தாது.
*****
இந்தக் கவிதையின் இருண்மை பிடிக்கவில்லை
என்றால் நச்சரிக்காதீர்கள்! உங்களுக்குப் பிடித்த கவிதை ஒன்றை பிடிக்காமல் போகும்
வரைப் படித்துக் கொண்டே இருங்கள்!
*****
No comments:
Post a Comment