Love demon

காதல் சூன்யக்காரி

சொர்க்கத்தில் சந்தித்த போது கண்ணீரும்

நரகத்தில் சந்தித்தப் போது முத்தமும்

பூமியில் சந்தித்தப் போது காதலும் தந்தவள் நீ

ஏன் இப்படி மாற்றி மாற்றித் தந்ததாய் என்றதற்கு

மாற்றித் தருவதுதான் காதல் என்றாய்

புன்னகைக்குக் கொஞ்சம் அழுகையும்

அழுகைக்குக் கொஞ்சம் புன்னகையும்

அறிவுக்குக் கொஞ்சம் அறியாமையும்

அறியாமைக்குக் கொஞ்சம் அறிவையும்

அன்புக்குக் கொஞ்சம் சண்டையையும்

சண்டைக்குக் கொஞ்சம் அன்பையும்

ருசித்துப் பார் என்பாய்

சோற்றுக்குக் கொஞ்சம் ஊறுகாயும்

ஊறுகாய்க்குக் கொஞ்சம் சோறும்

என்பது போலா என்ற என்னை

திகட்டாதத் தித்திப்புக்காரியாய் நோக்கி

கட்டெறும்பாய்க் கடிக்கத் தொடங்கினாய்

சுண்டுவிரலைக் கடித்துக் கொண்டேன் நான்

சுவைக்கத் தொடங்கினாய் நீ

*****