Creating God is Eternal

கடவுள் சிருஷ்டிக்கப்படுகிறார்

விரைந்து கொண்டிருக்கும் இரு சக்கர வாகனத்தின்

சைடு ஸ்டாண்டை எடுத்து விடச் சொல்லி

சைகைக் காட்டிச் செல்பவரும்

அறிந்தவர் போல நொடிப் பொழுதும் யோசிக்காமல்

மிகு தாக நெருக்கடியில்

மினரல் வாட்டர் பாட்டிலை நீட்டுபவரும்

அவசர அவசரமாய்ச் செல்கையில்

விபத்தொன்றைப் பார்க்கையில்

108 க்குத் தகவல் சொல்லிக் காத்திருப்பவரும்

பைவ் மினிட்ஸ் ப்ளீஸ் எனக் கெஞ்சி

மரப்பு ஊசிப் போட வந்தவரை நிறுத்தி

சுகப்பிரசவத்துக்காகக் காத்து நிற்கும் தாதியும்

பாதாளச் சாக்கடையின் திறக்கப்பட்ட

மூடிக்கருகே குச்சி நட்டு அதன் உச்சியில்

பாலிதீனைப் பறக்க விட்டுச் செல்பவரும்

வியர்த்து வடியும் வாகன நெரிசலில்

சலிப்பின் நெருப்பில் காத்திருந்து கிளம்பும் நெருக்கடியில்

பேருந்து ஒன்றின் பின்பக்கக் கண்ணாடி வழி தெரிந்த

டாட்டா காட்டும் சிறுமிக்காக கை அசைப்பவரும்

இப்படித்தான் என்றில்லை

அப்படித்தான் என்றில்லை

எப்படியும் சிருஷ்டிக்கலாம் கடவுளை

*****