திசைச் சுற்று

திசைச் சுற்று

பிரசவத்தில் உயிர் பிழைத்த குழந்தையும்

மாரடைப்பில் மாண்டு போன தாதியும்

விபத்தில் செத்துப் போன பயணியர்களும்

உயிர் பிழைத்த ஓட்டுநரும்

மாநகர மாமழை வெள்ளத்தில் மாண்டவனும்

சுனாமிப் பேரலையில் நீந்தி வந்தவனும்

விண்வெளி ஓடத்தில் பாதுகாப்பாய் இருப்பவரும்

ஆழ்துளைக் கிணற்றில் உயிர் விட்டக் குழந்தையும்

சுரங்கத்தில் சிக்கிச் சிதிலமானத் தொழிலாளியும்

பூமியின் அடியில் ஆய்வகத்தின் விஞ்ஞானியும்

ஆப்பிரிக்காவில் பசியால் செத்தவரும்

அமெரிக்காவில் கொலஸ்ட்ராலில் மூச்சை நிறுத்தியவரும்

ஒரு திசையில் தாகத்தால் விக்கித்துச் சாகுபவரும்

எதிர் திசையில் குளிர் பானத்தால் போதை கொள்பவரும்

எப்படித்தான் இப்படியும் அப்படியும் சுற்றாமல்

ஒரே திசையில் சுற்றுகிறதோ பூமி

தலை சுற்றுகிறதே சாமி

*****