காலப்பெருவெளிக் கவிதைகள்

காலப் பெருவெளி

அனாதையாய்க் கொட்டிக் கிடக்கிறது காலம்

காலண்டர்கள் கண்டுபிடிக்கப்பட்டதற்கு முன்

இருந்தக் காலத்திற்கு அதனால் வருத்தம் இருக்காது

கடிகாரங்கள் அளக்காத காலம் இருந்திருக்கிறது

கால இயந்திரம் கண்டுபிடிப்பது குறித்தும்

காலத்திற்கு ஆட்சேபனை இருக்காது

கொட்டிக் கிடக்கும் இலைகள்

பறந்து சென்றால் என்ன

பக்கத்தில் இருந்தால் என்ன

மரத்துக்கு என்ன கவலை

மைக்ரோ செகண்ட் துல்லியமாய் அளந்தாலும்

கொட்டிக் கொண்டிருக்கும் காலத்திற்கு என்ன

வற்றி விடவாப் போகிறது

அனாதியாய் விரிந்து கிடக்கிறது

அனாதையாய்க் கொட்டிக் கிடக்கும் காலம்

*****