பெண் பார்த்தல்

பெண் பார்த்தல்

சிறு பெண் குழந்தை முதல் கிழவி வரை

வந்து கொண்டு இருக்கிறார்கள்

நூடுல்ஸ்க்கு வரும் குழந்தைப் பெண்

காபிக்கு வரும் கிழவி

ஆண்களின் முகச்சவரப் பசைக்கு வரும் பருவப் பெண்

நட்ட நடுநிசியில் ஆண்மைக் குறைவுக்கு

நிகழ்ச்சித் தொகுப்பாளாராக வரும் இளம் பெண்

கருப்பை இழிவுபடுத்தி

சிவப்பழகு பசையைத் தடவச் சொல்லும்

வெள்ளை நிறத்து ஒரு பெண்

அண்மைச் செய்திகளை

அதற்கான முன்தயாரிப்புகளோடு வாசிக்கும் பெண்

அச்செய்தியின் ஊடே

பாலியல் பலாத்காரத்துக்கு உட்பட்ட மற்றும்

விளம்பர இடைவேளைக்கு இடையில்

உட்படப் போகும் பெண்

கழுத்தறுப்பட்டு சங்கிலிக்காக

ரத்தம் சொட்டச் சொட்ட

சாலையில் தரதரவென்று

இழுத்துச் செல்லப்பட்டப் பெண்

பெண்கள் பெண்கள் பெண்கள்

வந்து கொண்டே இருக்கிறார்கள்

வந்து கொண்டே இருப்பார்கள்

கடை மூடி வியாபாரம் முடியும் வரை

பெண்கள் கூடி பார்த்துக் கொண்டும் இருப்பார்கள்

*****