பாம்பின் பயணங்கள்

பாம்பின் பயணங்கள்

நள்ளிரவில் நடுச்சாலையில் நகரும்

பாம்பின் புத்திசாலித்தனம்

அதே நள்ளிரவில் நடுச்சாலையில் விரையும்

வாகனத்துக்குத் தெரியாமல் இருக்கலாம்

சக்கைச் சக்கையானப் பாம்பின் துண்டங்கள்

சிதறிக் கிடக்கின்றன

விபத்தின் பிரக்ஞையின்றி வாகனங்கள்

ஓர் ஓலைப் பாம்பை அடித்தால்

ஒன்பது ஓலைப் பாம்புகள் வருவது போல்

அடுத்தடுத்து விரைகின்றன

நடுச்சாலையில் செத்த பாம்பு அதன் பின்

கருவாடாய்க் காற்றில் பறந்து

சமாதிக்கான இடம் தேடி

டயரில் சிக்கிச் சுழல ஆரம்பிக்கிறது

விஷம் கொண்ட பாம்புகள்

இனி வாகனத்தில் அடிபடாமல் இருக்க

இம்முறை வாகனத்தில் பயணிக்கத் தொடங்கின

*****