வளர்ச்சிக்கானப் புற்றுநோய் திசுக்கள்

வளர்ச்சிக்கானப் புற்றுநோய் திசுக்கள்

இவன்தான் நீருற்ற வேண்டும் என்று

வியர்வையாய் வழிந்தவன்

அதற்கு முன் நாற்றை நட்டவன்

நிலம் பாளம் பாளமாக ஆனதென

நெஞ்சு வெடித்துப் பிராது கொடுத்தவன்

தனக்கான மரணம் வருவதற்கு முன்

சாசனத்தை மீறி முந்திக் கொண்டு செத்தவன்

பன்னாட்டுப் பண்டங்களை வாங்காமல்

நெல்லுக்கு விலை இல்லை எனக் கூச்சலிட்டவன்

கொத்து கொத்தாக மடிந்த இனத்தைக்

கண்டு கொள்ளவில்லை என

முத்து முத்தாகக் கவிதை வடித்தவன்

கால் வயிற்றுக் கஞ்சிக்காக

வயிற்றுச் சுருக்கத்தைப் பொறுக்க முடியாமல்

ஹைட்ரோ கார்பனுக்கு எதிராக முழக்கமிட்டவன்

எலும்பும் தோலுமாய்க் காட்சியளித்து

அலும்பு செய்யும் இவனை

ஏதேனும் செய்தாலும் செத்து விடுவான்

எதுவும் செய்யா விட்டாலும் செத்து விடுவான்

செங்கல் எடுக்க சரளைப் பொறுக்க

கலவைக் கலக்க சாந்து சட்டித் தூக்கப் பயன்படும் இவனை

ஸ்மார்ட் சிட்டியில் தூக்கிப் போடு

அஸ்திவாரத்தில் புதைத்து

வளர்ச்சிக்கானப் புற்றுநோய் திசுக்களை

அரவமற்ற உலகின் குரல்வளையற்ற மனிதர்களுக்கானக்

கட்டிடங்களாய்ப் பெருக்கித் தொலையலாம்

*****