பதாகையில் வாழ்பவைகள்

பதாகையில் வாழ்பவைகள்

உங்களுக்குப் பிடித்தக் குப்பைத் தொட்டியில்

நேர்மையைப் போடுங்கள்

துருத்திக் கொண்டு இருந்தால்

உண்மையையும் போடுங்கள்

அவசியமில்லையென்றால் அன்பையும்

போட்டு விடுங்கள்

மக்கும் குப்பைகளை எதிர் வீட்டில்

யாரும் இல்லாத சமயம் பார்த்து வீசுங்கள்

மக்காத குப்பைகளை வடிகால்களின் திறப்புகளில்

கொட்டி விட்டு திரும்பிப் பார்க்காமல் ஓடி வாருங்கள்

குப்பை அள்ளுபவர்கள் கடக்கையில்

வீடுகளில் நிரம்பியிருக்கும் பொய்மையையும் சுயநலத்தையும்

தாங்க முடியாமல் துர்நாற்றத்தின் வீச்சத்தில்

மூக்கைப் பிடித்துக் கொள்ளட்டும்

குப்பை லாரிகள் தெருவைக் கடக்க முடியாமல்

ராட்சச துர்நெடியில் மயங்கி விழட்டும்

தூய்மைக்கான நம் பிரச்சாரத்தை

பதாகையாக்குவோம்

நாள் முழுவதும் பேசித் தீர்ப்போம் வாருங்கள்

*****