கனவு தேசத்துக்காரர்கள்

கனவு தேசத்துக்காரர்கள்

குழந்தையின் கனவில் புகுந்து

கிலுகிலுப்பையைத் திருடிக் கொண்ட போது

நள்ளிரவு விழித்துக் கொண்டு அழுதது

பகல் பொழுதொன்றில் அதன்

பாலைப் பிடுங்கிக் குடித்த போது

வானம் ஓயாது வெயிலையும் மழையையும்

மாற்றி மாற்றிப் பொழிந்தது

கொஞ்சம் அதன் மழலை மொழிகளுக்கு

காதடைத்துக் கொண்ட போது

பூமியின் பேரிரைச்சல் அதிகமானது

கன்னத்தில் சற்று அழுத்திக் கிள்ளினால்

நடுக்கடல் நடுங்கி கொந்தளிக்கிறது

நடைபயின்று தடுமாறி விழும் போது

ஜென்ம சாபல்யம் அடைந்து விட்டதாக

குதூகலித்துச் சிரிக்கிறது கட்டாந்தரை

அது கூட பரவாயில்லை என்றால்

அழும் குழந்தையைப் பார்க்கச் சகிக்காமல்

நிலத்தைக் கிள்ளி விட்டு மலர் மேல் அமர்ந்து

தொட்டில் குழந்தை போல்

பெப்பெப்பே காட்டுகிறது

சிறகைச் சிமிட்டும் வண்ணத்துப் பூச்சி

*****