ஒரு கோப்பைக் கவிதை

கழுவிக் கழுவி ஊற்றுதல்

தேநீர்க் கடையில்

தேநீரும் கொஞ்சம் சோகங்களும்

பரிமாறிக் கொள்ளப் படுகிறது

முடிவில் இரண்டும் காலியாகிறது

காலி கண்ணாடிக் குவளையை வாங்கி

கடைக்காரர் கழுவி ஊற்றி

தேநீரை நிரப்புவதற்குள்

இன்னொருவரின் சோகம் தளும்பி விடுகிறது

பருகுதலின் முடிவில்

வழக்கம் போல் காலியாகிறது

கழுவிக் கழுவி ஊற்றப்படும் சோகங்களுக்காக

கொதித்துத் கொதித்துத் தயாராகும்

தேநீரைப் பார்க்கும் போதெல்லாம்

அந்தத் தேயிலைத் தோட்டத் தொழிலாளிகளின் சோகங்களையும்

கொஞ்சம் கழுவி ஊற்ற முடிந்திருந்தால்

எவ்வளவு நன்றாக இருந்திருக்கும்

*****