மாரடைப்பில் தப்பித்தல்

மாரடைப்பில் தப்பித்தல்

மாதச்சுமை

கணக்கெடுக்கிறது வாசிக்கிறது பயணிக்கிறது

அங்கும் இங்கும் அனுப்பி வைக்கிறது

களைப்பு மலைப்பாக இருக்கிறது

சலிப்பு மலையாக நிற்கிறது

ஓய்வுக்காக வாரத்தின் எட்டாம் நாள்

தேவையாக இருக்கிறது

சத்தமாகப் பாடினால் லேசாகலாம்

இரைச்சல் சுற்றி சூழ்ந்திருக்க

எவ்வளவு உரக்கப் பாடினாலும்

பாடும் குரல் பாடுபவருக்குக் கேட்கப் போவதில்லை

குறைந்தபட்சம் நான்கு முறையும்

அதிகபட்சம் எட்டு முறைகளும்

தெண்டனிட்டப் பிறகு

கொஞ்சம் ஓய்வு வழங்கப்படுகிறது

அதற்காக மனஉறுதியோடு முயலவும்

விடாமுயற்சியோடு செயல்படவும்

பயிற்சியளிக்கப்படுகிறது

சிறுக சிறுக முயன்றால் அடைந்து விடலாமென

சிறிது சிறிதாக நேரம் அபகரிக்கப்படுகிறது

அதிக அழுத்தம் கொடுக்கப்படுகிறது

ஒரு மாதிரியாக இருக்கிறது

தப்பிப்பது புரியவில்லை

மாரடைப்பு வந்து காப்பாற்றுகிறது

இயல்பாக இருக்க

இயல்பை மீறாமல் இருக்க

யாரும் கற்றுத் தர மாட்டார்கள்

*****