நவயுகக் கவிதைகள்

நாக்கற்றவர்களின் குரல்கள்

செருப்பில்லாதப் பாதங்களின்

விம்மல்கள்

குழிப்புண் வந்த சாலைகளுக்கு

எப்படித் தெரியும்

மூழ்கும் கப்பலின்

ஓலங்கள்

குபுக் குபுக் என்று உட்புக விடும்

ஓட்டைகளுக்கு

எப்படிப் புரியும்

முப்பொழுதும் பேரங்களுக்கு

ஈடுகொடுக்கும் கீரைக்காரக் கிழவியின்

தொண்டைச் செருமல்

கந்துவட்டிக்காரனின் தொண்டைகள்

எப்படி அறியும்

இரவை விற்று பகலில் உறங்குபவனின்

அகோரப் பசி

கமிஷன்களில் ஏப்பமிடும் வயிறுகளுக்கு

எப்படி விளங்கும்

ஏழைகளுக்குப் போட்ட நகைகள்

எப்போதும்

அடகுக் கடையில் பாதுகாப்பாக இருக்கும்

*****