அபயக்குரலின் கவிதைகள்

ஊழியங்களும் சேவகங்களும்

இருந்த மரங்களையெல்லாம் வெட்டி

சாலையமைத்தப் பிறகு

சாலையோரத்தில் மரம் நட

ஆணை வருகிறது

காட்டை அழித்து

ஆலையமைத்தப் பிறகு

அதன் நடுவே ஒரு பூங்கா அமைக்க

உத்தரவு வருகிறது

ஏரியைத் தூர்த்து

கட்டிடம் அமைத்தப் பிறகு

மழைநீர் சேமிப்பு அமைப்பு அமைக்க

காகிதம் வருகிறது

இருந்த மணலையெல்லாம்

களவாண்டு முடித்தப் பிறகு

மணல் குவாரியை மூட

தீர்ப்பு கிடைக்கிறது

எதுவும் உபயோகத்துக்காக வருவதில்லை

வருவதற்காக வருகிறது

கடமையாற்றி விட்டதாகப் போகிறது

பொதுவான அவர்களின்

ஊழியங்களையும் சேவகங்களையும் போல

*****