புதிய வகைமை கவிதைகள்

சிலுவையின் நான்கு வெடிகுண்டுகள்

ஆலயத்தில் குண்டு வெடித்து இறந்தவன்

பிதாவிடம் சென்ற போது

என்னை ஏன் கொன்றீர் என்றான்

அவர் தன் வயிற்றைச் சுற்றிக்

கட்டப்பட்டிருந்த தானியங்கி வெடிகுண்டை

தடவிப் பார்த்துக் கொண்டார்

மெல்ல புன்னகைத்தவர்

வெடிகுண்டு படுக்கையில் படுத்திருந்த

கடவுள் ஒருவரையும்

கழுத்தில் வெடிகுண்டுச் சுருள் சுற்றப்பட்டிருந்த

கடவுள் ஒருவரையும்

கண்ணி வெடியின் மேல்

கால் வைத்த படி அமர்ந்திருந்த

கடவுள் ஒருவரையும் காட்டினார்

சிலுவையின் நான்கு முனைகளிலும்

காலக் கணக்குக் காட்டி ஒளிரும்

வெடிகுண்டுகளைச் சுட்டிக் காட்டியவர்

ஆணிகள் மாறி விட்டன

வெடிகுண்டுகள் பிறந்து விட்டன என்றதை

சீடர்கள் பதிந்து கொண்டு

முகநூல் டிவிட்டர் கணக்கைத் திறந்து

வாட்ஸ் அப்பை நோண்டத் தொடங்கினர்

சத்தமிடத் தொடங்கின அவலக் குரல்கள்

*****