புதிய அரசியல் கவிதைகள்

நாம கரணம்

மனிதன் துடிதுடித்துச் சாவதையும்

புழுக்கள் துடிதுடித்து வாழ்வதையும்

சாக்கடை நதியில் பார்க்கிறேன்

அழுக்குகள் கசடுகள் கலந்து செல்வதையும்

உண்மைகள் நேர்மைகள் கலங்கி நிற்பதையும்

சாக்கடை நதியில் நீங்களும் பாருங்கள்

துர்நாற்ற துர்வீச்ச மயமாவதையும்

நன்னீரும் குடிநீரும் மாயமாவதையும்

சாக்கடை நதியில் யாவர்க்கும் கவனப்படுத்துங்கள்

இந்தச் சாக்கடை நதி

எங்கெங்கெல்லாம் இருக்கிறது பாருங்கள்

எங்கெங்கெல்லாம் ஓடுகிறது பாருங்கள்

அதன் பெயர் என்னவென்று விசாரியுங்கள்

அரசியல் என்று சொல்லாமல்

உங்கள் நகரத்து நதி என்றோ

கூவம் என்றோ பொய் சொன்னால்

தயவுசெய்து என்னை மன்னியுங்கள்

*****