புதிய தலைமுறைக் கவிதைகள்

மீட்பருக்கான பிரார்த்தனை

அவர்களின் வண்ணங்களை

தெருவில் விசிறி எறிந்த பிறகு

அவர்களின் வானவில்லை

முறித்து போட்டப் பிறகு

அவர்களின் கனவுகளை

காயலான் கடையில் விற்ற பிறகு

அவர்களின் மனதில் மலர்ந்த

ஆயிரம் மலர்களை

இறுதி ஊர்வலத்தில் தூவிய பிறகு

அவர்களை ஏன் கொண்டாடுகிறீர்கள்

உங்களின் கெளரவத்துக்காக

உங்களின் பேராசைகளுக்காக

உங்களின் மன பண மோகத்துக்காக

காயடிக்கப்பட்டவர்களைக் கொண்டு வந்து

ஆசிர்வதிக்கச் சொல்லாதீர்கள்

ஆசிர்வதிக்கப்பட்டு பூமிக்கு வந்தவர்களை

சாத்தான்களில் குழந்தைகளாக்கி விட்டு

பூமியின் மனிதாபிமானம்

செத்து விட்டதாக ஒப்பாரி வைக்காதீர்கள்

உங்களுக்கான ஆதரவற்றோர் இல்லங்களில்

நீங்களே விண்ணப்பித்துச் சேர்ந்து

மீட்பருக்கானப் பிரார்த்தனையைத் தொடருங்கள்

*****