பிரமைதாசன்

பிரமைதாசன்

உனக்குப் பேசப் பிடிக்கும்

எனக்கு மெளனம் பிடிக்கும்

நீ பேசிக் கொண்டிருந்தாய்

நான் கேட்டுக் கொண்டே இருந்தேன்

நீ பேசியது மறந்து விட்டது

பேசுவது மட்டும் கேட்டுக் கொண்டேயிருக்கிறது

இப்போதும்

தூக்கத்திலிருந்து விழித்தெழும் போதும்

கையிலிருக்கும் தேநீர்க் கோப்பை நழுவி விழும் போதும்

மாடிப் படிகட்டுகளிலிருந்து தவறி விழும் போதும்

நடுச்சாலையின் மத்தியில் விபத்தில் சிக்கும் போதும்

அவசர ஊர்திகள் அடிக்கடி கடக்கும் போதும்

ஓடிச் சென்று பிடிக்க முடியாத பேருந்திலிருந்து

ஒரு குழந்தை டாட்டா காட்டும் போதும்

சர்க்கரை அளவு குறைந்து எங்காவது

மயங்கி விழும் போதும்

நீ பேசிக் கொண்டே இருக்கிறாய்

இறந்த பின்னும் பேசும்

அபூர்வ சக்தி படைத்தவள் நீ

செத்தப் பிணம் போல் இருந்து

காதுகளில் கீச்சிட்டுக் கொண்டிருக்கும்

அதைக் கேட்டுக் கொண்டிருக்கும் பிரேமைதாசன் நான்

*****