செய்யாதன திருந்தச் செய்

செய்யாதன திருந்தச் செய்

ஒன்பதாவது திசையொன்று உதித்த போது

எட்டு வண்ண வானவில்லை

சுருட்டி எடுத்துக் கொண்டவர்கள்

தெற்கில் மறைந்த சூரியனை

வடக்கில் தேடிக் கொண்டு சென்றார்கள்

சுற்றி வந்தால் சுற்றிப் பார்த்தால்

எல்லாம் ஒன்றாகி விடும்

பத்தாவது திசையொன்றும் உதிக்கக் கூடும்

ஒன்பது வண்ணத்திலும் வானவில் தோன்றக் கூடும்

கேள்வி என்பது என்ன

இருக்கின்ற ஏழு வண்ண வானவில்லை என்ன செய்வது

இருக்கின்ற எட்டுத் திசைகளை என்ன செய்வது

பழக்க தோஷத்தில் கிழக்கில் தோன்றி மேற்கில் மறையும்

சூரியனை என்ன செய்வது

இல்லாதவைகளைத் தேடும் வாழ்க்கையில்

இருப்பவைகளை என்ன செய்வது

கேள்வி கடினமானதாக இருப்பின்

நீட் தேர்வுக்கோ ஏதேனும் போட்டித் தேர்வுக்கோ

தயார் செய்யுங்கள்

கேள்விகள் எளிதாகி விடும்

பதில்கள் கடினமாகி விடும்

*****