மழை ரகசியம்

மழை ரகசியம்

எப்போதோ வந்த அந்த மழையிடம்

ஒரு தேநீர்க் கேட்டு

அது கோபித்துக் கொண்டு போன

ரகசியத்தை யாரிடமும் சொல்லி விடாதீர்கள்

குடையோடு வந்த பலர் சபிக்கக் கூடும்

மழையில் நனைத்து தூய்மையாகட்டும் என்று

புழுதி நிறஞ் சூழ ஓட்டிக் கொண்டிருக்கும்

வாகன ஓட்டிகள் திட்டக் கூடும்

தாள் கிழிக்காமல் கிழியாத நோட்டோடு

கத்திக் கப்பலின் கனவில் சென்று கொண்டிருக்கும்

சிறுமிகள் செல்லமாய்ச் சிணுங்கக் கூடும்

மிகவும் வற்புறுத்திக் கேட்டால் மட்டும் சொல்லுங்கள்

மழைக்குச் சர்க்கரை வியாதி என்று

மீண்டும் வற்புறுத்திக் கேட்டால்

சர்க்கரையற்ற தேநீர் மழைக்குப் பிடிக்காது என்று சொல்லுங்கள்

*****