அர்த்தப்பாடுகள்

அர்த்தப்பாடுகள்

இனியும் சொல்ல முடியாத விரக்தியில்

வார்த்தைகளை விசிறியடிக்கத் தோன்றுகிறது

இந்த வார்த்தைகளுக்கு யார் அர்த்தம் கொடுத்தார்கள்

அவரவர்களாக செய்து கொண்ட

அர்த்தத்தைத் திணித்த வார்த்தைகளையே

சுற்றிச் சுற்றி உலவ விட்டார்கள்

அறிவுரை பகர்பவர் பொய் சொல்லலாம்

கேட்பவர் உண்மை பகர வேண்டும் என்ற

உண்மை எனும் வார்த்தைக்கான

அர்த்தத்தை அகராதியில் நீங்கள் பார்த்ததுண்டா

வார்த்தைகள் பிடிக்காத விரக்தியில்

மெளனமாகத்தான் முடிகிறதா

சம்மதம் என்ற வார்த்தையைப் போட்டு

மெளனத்தின் அடையாளத்தை அர்த்தப்படுத்தும் போது

இல்லையென்றா புலம்புவீர்கள்

விழும் ஒளி எதிரில்தான் எதிராகத்தான் பிரதிபலிக்குமோ

எதிரில் தெரியும் கண்ணாடி பிம்பத்தில்

இடவல மாற்றம் இருப்பது போல

சிதறி விழும் வார்த்தைகளின் அர்த்தங்களில்

தலைகீழ் மாற்றங்கள் உண்டாகக் கூடும்

வார்த்தைகளாலான இந்தக் கவிதையை

தவறாக அர்த்தப்படுத்திக் கொள்ளவும்

அவரவர்க்கு உரிமை இருக்கிறது

*****