மரணம் வழங்குபவர்களுக்கு மரியாதை செய்யுங்கள்

மரணம் வழங்குபவர்களுக்கு மரியாதை செய்யுங்கள்

நான் என் குற்றத்தைத் தொடங்குவதற்குக்

கால தாமதம் செய்கிறேன்

தண்டனைகள் எரிச்சலோடு

பார்த்துக் கொண்டிருக்கின்றன

சட்டம் தன் கடமையைச் செய்ய

இனியும் காத்திருக்க முடியாது என

பொங்கி எழுகின்றனர்

முன் தயாரிப்புகள் தொடங்குகின்றன

துப்பாக்கிச் சத்தம் ஒலித்து

சரிந்து விழும் ஒருவனை

ஜன்னலடைத்து மனக்கண்ணில்

பார்த்துக் கொள்ளுங்கள்

மரண தண்டனை நிறைவேற்ற

அதிகாரமளிக்கப்பட்ட சீருடை அணிந்த

விறைப்பு நடை போடும் அவர்களை

பயம் கலந்த மிரட்சியோடு மருண்டு பார்த்து

மரியாதை செய்து வணக்கம் வையுங்கள்

உங்களை நோக்கி பாய இருக்கும்

ஒரு தோட்டாவின் எண்ணிக்கையைக்

குறைத்துக் கொள்வார்கள்

தேவைப்படும் பட்சத்தில் உங்களுக்காக கூடுதலாக

ஒரு தோட்டாவையும் நிரப்பிக் கொள்வார்கள்

*****