வெட்கப்பட்டு புன்னகைக்கிறார் காந்தி

வெட்கப்பட்டு புன்னகைக்கிறார் காந்தி

இந்தக் காலத்தில்

இரண்டாயிரம் ரூபாய் நோட்டுக்கு

இருபது ரூபாய்தான் மதிப்பு என்கிறான் ஒருவன்

ஆமாம் ஆமாம்

அதைத்தான் இருபது ரூபாயில் டோக்கன் போட்டு

நிரூபித்துப் போனான் ஒருவன் என்கிறான் மற்றொருவன்

கொடுத்தப் பணத்தையெல்லாம் வாங்கிக் கொண்டு

நோட்டாவுக்கு ஓட்டைப் போடவும்

பெரிய மனசு வேண்டும் என்கிறான் அந்த ஒருவன்

கொடுப்பதற்கு ஒரு மனசு வேண்டும் என்றால்

கொடுப்பதை வாங்கிக் கொண்டு

போடுவதற்குத்தான் போடுவேன் என்பதற்கு

இன்னும் பெரிய மனசு வேண்டும் என்கிறான்

அந்த மற்றொருவன்

கொடுக்கப்பட்ட அத்தனை நோட்டுகளில் இருந்த

எல்லாவற்றிற்கும் மெளன சாட்சியாகி விட்ட

காந்தி வெட்கப்பட்டு புன்னகைக்கிறார்

ஓட்டுக்குக் கொடுத்தால்

நோட்டு செல்லாததாகி விடும் என்று

கையெழுத்து விட்டு கைத்தடியூன்றி

எழுந்து நடக்க எத்தனிக்கும் அவரை

அங்கேயே இருத்தி மீண்டும் மீண்டும்

மரியாதை நிமித்தம் மானாங்காணியாய்

அடிக்கப்படுகிறார் அச்சுகளால்

*****