நாம் கேட்டு உறங்கும் நாராசத் தாலாட்டுகள்

நாம் கேட்டு உறங்கும் நாராசத் தாலாட்டுகள்

நாம் பாடிய தாலாட்டுகள்

தலைமுறைகளைத் தூங்க வைத்து விட்டன

காலமிது காலமிது

எப்படியாவது பிழைத்துக் கொள் என்று பாடிய தாலாட்டு

அடிமைகளாக்கி விட்டது

தஸ் புஸ் என்ற உளறும் மொழியைக்

கற்றுக் கொள் என்று பாடிய தாலாட்டு

உணர்ச்சிகளை மரத்துப் போகச் செய்து விட்டது

இருக்கும் வரை சுருட்டிக் கொள் என்று பாடிய தாலாட்டு

சகோதர ஏழைகளின் வயிற்றில் அடித்து விட்டது

திரையைக் காட்டிச் சோறூட்டியத் தாலாட்டு

பிம்பங்களின் காலடிகளில்

தொண்டனாய்த் தெண்டனிட வைத்து விட்டது

பெட்டிகளைப் பார்த்தால்

எத்தனைக் கால்களில் வேண்டுமானால் விழு என்று பாடிய தாலாட்டு

கட்டளைக்குக் கீழ்படியும் ரோபாவாக்கி விட்டது

பட்டுப் பீதாம்பரங்கள் பிடுங்கப்பட்ட

கந்தல் துணித் தொட்டில்களில் இடப்பட்ட

தாலாட்டுகள் நமக்காகப் பாடப்படுகின்றன

உறங்குவதற்கான தூக்க மாத்திரைகளின் நெடியை

வீச்சமாய் வீசிய படி

நாராசமாய்க் கேட்கும் தாலாட்டில்

எப்படி இப்படி உறங்கிக் கிடக்கிறோம் நாம்

*****