மினுமினுக்கும் யூதாஸின் காசுகள்

மினுமினுக்கும் யூதாஸின் காசுகள்

இலை உதிரும் மரத்தின் அடியில்

அமர்ந்திருக்கும் எங்களுக்கு

ஊழலை உதிர்த்து எறியத் தெரியவில்லை

கையூட்டைக் களையத் தெரியவில்லை

ஓட்டுக்கு நோட்டை வாங்காமல் இருக்கத் தெரியவில்லை

தவறுகளைத் தட்டிக் கேட்கத் தெரியவில்லை

கண் முன்னே எல்லாம் களவு போவதைக்

கண்காணித்துக் காக்கத் தெரியவில்லை

களை பெருத்த களர் நிலத்தில்

உதிராத இலை மண்டிய புதர்கொடி அருகில்

நச்சுப் பாம்புகள் சூழ,

விஷமப் பூச்சியினங்கள் பறக்க

இலவசமாய்க் கிடைக்கிறதென்பதற்காக

விசத்தை வாங்கிப் பருகிக் கொண்டிருக்கிறோம்

ஒற்றைச் சவப்பெட்டியில் ஒன்பது பேரைப் புதைத்து விட்டு

ஒன்பதும் பேருக்கும் ஒன்பது சவப்பெட்டி என்று

கணக்கெழுதுபவர்கள் சிரித்துக் கொண்டிருக்கிறார்கள்

ஒற்றைச் சவப்பெட்டியில் நெருக்கியடித்துக் கொண்டு

ஒன்பது பேருமாக முக்கி முனகிப் படுத்துக் கொள்கிறோம்

ஆணிகள் அறையப்படுகின்றன

எங்கள் தலைவர்களே ஏன் எம்மைக் கை வீட்டீர்?

யூதாஸின் காசுகள் மினுமினுப்பதைப் போல

எங்கள் தலைவர்கள் புன்னகைக்கிறார்கள்

*****