கூண்டில் சுருளும் வானம்

கூண்டில் சுருளும் வானம்

விரிந்த வானை கூண்டுக்குள் தேடும் சிறுபறவை

அளந்து பார்க்கிறது

இவ்வளவு பெரிதா வானம்

அளக்க அளக்க கூண்டுக்குள்ளே மடங்கிச்

சுருண்டு கொள்கிறது வானம்

மடக்கி வைக்கப்பட்ட வானில்

ஏதோ ஒரு மடிப்பில்

சக பறவைகள் இருக்கக் கூடும்

ஏதோ ஒரு மடிப்பில்

மரமொன்று இருக்கும்

மற்றுமொரு மடிப்பில்

கனிகள் குலுங்கிக் கொண்டிருக்கும்

பூச்சிகள் பறந்து கொண்டிருக்கும்

விரித்துப் பார்க்கும் ஏதோ ஒரு மடிப்பில்

கூண்டுக்குள் அடைபட்ட வானின்

விரிந்து கொள்ளும் கூண்டின் திறவுகோல் இருக்கும்

வெட்டப்பட்டால் வளரும் சிறகுகளுக்கு

நம்பிக்கை எனப் பெயர் சூட்டி

அடிக்கடி சிறகடித்துக் கொள்ளும் சிறுபறவை

*****