இரவுகளின் பிரார்த்தனை

இரவுகளின் பிரார்த்தனை

இரவின் இளைப்பாறலைத் தர வேண்டும் எனும்

பிராத்தனை ஒலிக்கத் தொடங்குகிறது

உறங்கும் பகல் இரவாகிறது

உறங்கும் பகலில் இரவை விழிக்கச் செய்து

காசுக்கென வேலை பார்ப்பதை

கேலி செய்தபடி ஒளி வீசுகின்றன நட்சத்திரங்கள்

அரை குறையுமாக தேய்ந்தும் வளர்ந்தும்

விழித்திருக்கும் நிலா

அமாவாசை நாளில் ஓய்வெடுத்துக் கொள்கிறது

வெளிநாட்டில் ஒளி கொள்ளும் பகலுக்காக

இருள் கொள்ளும் பொழுதில் உழைக்கும் நாட்டில்

பிறந்ததற்காக பிரார்த்தனை ஒலிக்கத் தொடங்குகிறது

மனித்த இந்தப் பிறவி தொலையட்டும்

மறுபிறவியிலாவது உறக்கம் கொள்ளத் தக்க இரவு அமையட்டும்

பிரார்த்தனை மீண்டும் மீண்டும் ஒலிக்கத் தொடங்குகிறது

கொட்டாவிச் சத்தம் விண்ணைப் பிளக்கிறது

வானம் வாய் பிளந்து துடித்துக் கொண்டிருக்கிறது

சூரியச் சுடரைத் துப்பி இரவை ஒரு முடிவுக்குக் கொண்டு வர

*****