குஞ்சு மீன் நீந்தக் கற்றுக் கொண்டது

குஞ்சு மீன் நீந்தக் கற்றுக் கொண்டது

மீன் குஞ்சுக்கு நீச்சல் கற்றுக் கொடுக்கும்

இவ்விடத்தில்

அது நீந்தாமல் சோம்பிக் கிடக்கிறது

கட்டணம் லட்சங்களில் கட்டியாகி விட்டது

மிஸ்கள் போராடிப் பார்த்து விட்டார்கள்

டீ கிரேடுக்கும் கீழாக போடுவதென

முடிவாகி விட்டது

கற்றல் குறைபாடு இருக்கக் கூடுமென

மனநல மருத்துவரைப் பரிசீலிக்க

பரிந்துரைத்து ஆகி விட்டது

தாய் மீனும் தந்தை மீனும்

எப்படியாவது நீந்தக் கற்றுக் கொண்டு விடு என

குஞ்சு மீனிடம் கேவிக் கேவி அழுதார்கள்

மந்தமாகிக் கொண்டே போனது குஞ்சு மீன்

வெறுத்துப் போய் ஒரு நாள் கடலில் தூக்கி எறிந்தார்கள்

நீந்தக் கற்றுக் கொண்டது குஞ்சு மீன்

*****