உருட்டி மிரட்டும் காலக் கிழவன்

உருட்டி மிரட்டும் காலக் கிழவன்

பணபட்டுவாடா இல்லாமல் முடிந்து விடுமா என

கண்ணெதிரே பொரியெனப் பொரிந்து

பிரமை தட்டுகிறது

வாக்களிக்கும் இயந்திரம்

மூன்றாவது முறையாக கனவில் வந்து கலைகிறது

சின்னங்கள் மங்கலாகத் தோன்றி மறைகின்றன

அபார்ஷன் ஆன ரத்தக் கவிச்சை வாடை

எதேச்சையாக கடந்து போகிறது

ரூபாய் நோட்டுகள் பறக்கும்

வழக்கமான கிளிஷே வழக்கம் போல்

திகிலூட்டுகிறது - ஏன் திகட்ட மாட்டேன்கிறது

என்பது புரியாமல் மென்று கொண்டிருக்கிறது மனம்

நல்ல விலைக்குப் பேரம் பேசி விற்பதற்குத்தானோ

பேரம் பேச விடாமல் வாங்கிக் கொள்வதற்குத்தானோ

எதற்கென்று புரியாமல் கையிலிருக்கும்

கண் மை டப்பாவை வைத்து

ஆள்காட்டி விரலை நீட்டச் சொல்லி

முகத்தில் பூசி விடுவது போல

உருட்டி மிரட்டுகிறான் காலக் கிழவன்

காப்பாற்றுங்கள் என்று கத்துபவனின்

உடம்பு வியர்க்கிறது

ஓட நினைப்பவனின் கால்கள் ஓட மறுக்கின்றன

கெட்ட கனா கண்டியா என்று கேட்க யார் இருக்கிறார்கள்

*****