உதிரும் பிம்பம்

உதிரும் பிம்பம்

கண்ணாடிக்கு எல்லாம் தெரியும்

அலங்கார முகமும்

அலங்காரமற்ற முகமும்

கண்ணாடி எல்லாம் காட்டும்

நிர்வாணம் உட்பட

கண்ணாடி பார்ப்பது

எளிது போல் தோற்றம் தரும் கடினம்

கலையப் போகும் பிம்பத்தை

கலையும் முன் காட்டுகிறது கண்ணாடி

கண்ணாடி பார்த்து நாளாயிற்று என்று

சொல்பவனைப் பார்த்தால் கும்பிடு போடு

பிம்பத்தைத் தொலைத்தவர்களைப் பார்ப்பது அரிது

இருப்பதைத்தானே காட்டுகிறது கண்ணாடி

இல்லாததைப் பார்ப்பதைப் போல் ஏன் பார்க்கிறாய்?

ரசம் போனக் கண்ணாடியில்

தேய்த்தபடி கிடக்கிறது உன் பிம்பம்

நீரலையில் நெளியும் பிம்பம் போலாகட்டும்

கல் விட்டு எறி குறி பார்த்து

பெரிய உருவத்தைச் சிறியதாக்கும் கண்ணாடியில்

உடையும் ஒவ்வொரு சில்லிலும்

உதிர்ந்து கிடக்கட்டும் ஒரு பிம்பம்

*****