விண்ணில் எழும் சூரியன்

விண்ணில் எழும் சூரியன்

எமனுக்கு எத்தனை நாள் ஏக்கம் இருக்கும்

உம் தமிழைக் கேட்காமல் மனம் பொறுத்து இருக்கும்

போராடிப் பார்த்து முடியவில்லை உம்மை கொண்டு செல்ல

மண்டியிட்டு அழைத்துச் செல்கிறான் உம்மை மெல்ல

வானுக்கு ஒரு சூரியன் அங்கிருக்க

பூமிக்கு ஒரு சூரியன் இங்கிருக்க

வானத்துச் சூரியன் மறையலாம்

பூமியின் சூரியன் மறையலாமா

மண்ணில் தினம் எழும் சூரியன்

விண்ணில் சென்று உறையலாமா

ஓய்வுக்கு ஓய்வு கொடுத்து சுழன்றவா

மரணத்துக்கு ஓய்வு கொடுத்து மீண்டு வா

முத்தமிழும் உம் சொல் பட்டு தித்திக்குமே

உம் மரண செய்தி சொல்கையில் கசக்கின்றதே

பெரியாரைப் பிரிந்து எத்தனை நாள்

இருப்பதெனச் சென்றாயோ

அண்ணாவை இழந்து இத்தனை நாள்

இருப்பதா எனச் சென்றாயோ

உம்மொழியால் செம்மொழி ஆன தமிழ்

பேனா பிடித்து நீ வளர்த்த பகுத்தறிவு

நா சுழற்றி நீ காத்த சமூக நீதி

போராடி நீ காத்த மாநில சுயாட்சி

உம் பேர் சொல்ல ஆயிரம் இருந்தாலும்

நீர் இல்லாமல் நீர் இல்லா நிலமாகிறோம்

முக்கனியே நீர் இல்லாமல் வித்தில்லா பழமாகிறோம்

நூற்றாண்டுப் போராட்டமே

திராவிடத்தின் உயிரூட்டமே

கழகத்தின் காவல் மரமே

இலக்கியத்தின் பெட்டகமே

சம நீதியின் வரலாறே

சம கால போர்வாளே

ஆரூரில் புறப்பட்டது உம் பயணம்

காவிரியில் நிகழ்ந்தது உம் மரணம்

வரலாற்றில் இனி எழுத என்ன இருக்கிறது

வரலாறே நீ எழுதியது அன்றோ

கண்கள் கண்ணீர் கடலாக கடலை விட்டு

சூரியரே விண்ணில் எழுதல் நன்றோ

(ஓய்வறியா சூரியன் கலைஞர் மு. கருணாநிதி அவர்கள் ஓய்வு கொள்ள, கடிகாரத்தைப் பொருட்படுத்தாது காலமாய்ச் சுழன்ற அவர் காலமான பொழுதில்...07.08.2018 செவ்வாய் மாலை )

*****