பஞ்சு மிட்டாய் செத்து விட்டது

பஞ்சு மிட்டாய் செத்து விட்டது

நறுக்கப்பட்ட விரல்களைப்

பொறுக்கி எடுத்துக் கொண்டு ஓடுகிறான்

பிடுங்கப்பட்ட கண்கள்

பைகளில் இருக்கின்றன

கட்டளைகளுக்கு கட்டுப்பட்ட காதுகள்

உடலெங்கும் வியாபித்து இருக்கின்றன

புத்தகங்களை எடுத்து மடியில் வைக்கும் போது

முணுமுணுக்க அவனது வாய்

அவனுக்கு வழங்கப்படுகிறது

அழுகையின் வரைபடங்களை

அவ்வபோது வரைந்து

கனவுகளில் கடிபட்டு கதறுபவனின்

நோட்டுகளில் செத்துப் போய்

விரைத்துக் கிடக்கிறது பஞ்சு மிட்டாய்

அவன் தன்னை மாணவன் என்கிறான்

*****