இகலோக நம்பிக்கைகள்

இகலோக நம்பிக்கைகள்

கடலைக் குடிக்க முயன்று

தோற்றுக் கொண்டிருந்த மீன்குஞ்சு

கடல் தன்னைக் குடித்து விட்டதாக

புலம்பித் திரிந்தது

ஒரு பெரிய மீன் சிறிய இம்மீன்குஞ்சை

விழுங்கிய போது

கடல் இப்பெரிய மீனை விழுங்கி விடும்

என்ற நம்பிக்கையோடு இருந்தது

நம்மை விழுங்கிய காலம்

நம்மை விழுங்கியவர்களையும்

விழுங்கி விடும் என்ற நம்பிக்கையில்

ஓடிக் கொண்டிருக்கிறது இவ்வாழ்க்கை.

*****