வஞ்சனைகள் புரிதல்

வஞ்சனைகள் புரிதல்

செய்கின்ற பாவங்கள்

சற்று அதிகமாகத்தான் இருக்கின்றன

எறும்புகள் மேல் மண்ணெண்ணெய் ஊற்றி

கரப்பான் பூச்சிகளுக்கு தெளிப்பு மருந்து அடித்து

எட்டுக்கால் பூச்சிகளைத்

துடைப்பக் கட்டைகளால் துடைத்து எறிந்து

வறுத்து வைத்து இருக்கும் மீன்களுக்காக

பூனைகளைத் துரத்தி அடித்து

காவல் காக்கும் நாய்களை

நடுநிசி வேட்டைக்கு அனுப்பி

கிடாக் குட்டியின் ஈரலைப் புசிக்கும் இந்நேரம்

அதற்கு மேல் வஞ்சனைகள் புரிய விருப்பமின்றி

மீந்திருக்கும் பட்சணங்களை

பசியோடு வரும் பிச்சைக்காரனுக்கு இட்டு

சற்று நேரத்தில்

வேட்டைக்கு நடுவில் வீடு திரும்பும்

தொடைக்கறியைப் பிடுங்கும்

ரத்தம் ஒழுகும் நாய்களின் வாய்களை

கற்பனையில் பார்த்து சிரித்துக் கொள்கிறான்

ஊருக்கு ஒதுக்குப் புறத்தில்

தேவைப்படும் போது பாவ மன்னிப்பு கோரிக் கொள்ளும்

உல்லாச வீடு கட்டி ஒதுங்கிய ஒரு கனவான்

*****