பூனையும் மொசக் குட்டியும்

பூனையும் மொசக் குட்டியும்

திட்டுத் திட்டாய் கருமேகம்

எலிகளைப் போல ஓடி

அவைகளைத் தின்று கொழுத்த

கருப்புப் பூனை போலாகிறது

திடுமென கருத்த முடிகளெல்லாம் நரைத்து

உதிரத் தொடங்குவது போல

மழைப் பொழியத் துவங்குகிறது

அழுக்கைக் கழுவி பூமியில் ஊத்தி விட்டு

வெண்பற்கள் காட்டிச் சிரிக்கிற சிரிப்பில்

கருப்புப் பூனை காணாமல் போக

வெண்பஞ்சு நிறத்தில்

ஒரு மொசக்குட்டி

நீலப் பட்டாடை மேல் கண் துஞ்சுகிறது

காணாமல் போன கருப்புப் பூனை

மெல்ல அடியெடுத்து வந்து

கருப்புப் போர்வைப் போர்த்தி விட்டது போல

மெல்ல கவியத் தொடங்குகிறது இரவு

*****