உருவிய சைலன்ஸலிருந்து வெளிப்படும் வார்த்தைகள்

உருவிய சைலன்ஸலிருந்து வெளிப்படும் வார்த்தைகள்

விஷமான ஒரு வார்த்தை

பாம்பைப் போல் தீண்ட

அவர் இறந்து கொண்டிருப்பது அறியாமல்

அதை ஒரு கேலியாக எண்ணி

எல்லாரும் ரசித்துச் சிரிக்க ஆரம்பித்தார்கள்

சாவுக்கு முன் சிரிப்பு

‍செத்த பின் அழுகை என தேற்றிக் கொண்டார் அவர்

மறுநாள் அவர் உயிர் மீண்டு வருவாரோ

என்பது குறித்த பயபதற்றம் யாருக்கும்

இருப்பதாக தெரியவில்லை

வெட்கம் அறுந்துப் போனால்தான்

சமூகத்தில் வாழ முடியும் என்பதில்

தெளிவாக இருப்பவர்கள் எத்தனை பேரோ என

குழந்தையைப் போல அழ ஆரம்பித்து

கிழவனைப் போல சிரிக்க ஆரம்பித்தவர்

அப்படிச் சாதாரணமாக சொல்லத்தான் முடியுமா?

செத்துப் பிழைத்து வெட்கம் அறுந்து போனவர்கள்

இருக்க மாட்டார்களா என்ன?

விரையும் வாகனத்திலிருந்து உரக்கக் கத்தியபடி

சென்று கொண்டிருந்தார்

எச்சரிக்கையாக முன்கூட்டி

சைலன்ஸரை உருவியிருந்த அவர்

*****