பளிச்செனச் சிரிக்கும் நிலைக்கண்ணாடி

பளிச்செனச் சிரிக்கும் நிலைக்கண்ணாடி

பூட்டிக் கிடக்கும் வீட்டின்

உள்ளறையில் இருக்கும் நிலைக்கண்ணாடியில்

காலை முதல் மாலை வரை

இரவு முதல் விடியல் வரை

ஒரே காட்சி மாறி மாறித்

தோன்றி மறைகிறது

சலிப்பூட்டும் ஒரே மாதிரியான காட்சியைப்

பிரதிபலித்து சோர்ந்து போயிருக்கும்

நிலைக்கண்ணாடியை

எப்போதாவது பறந்து வந்து

கொத்தி விட்டுப் போகும் குருவி

பரவசமாக்கி விட்டுப் போகிறது

அலுப்பின் அழுக்கு துடைக்கப்பட்டதாய்ப்

பளச்சென சிரிக்கிறது நிலைக்கண்ணாடி

*****