வாக்குறுதிகளைப் பொறுக்க முடியாதவன்

வாக்குறுதிகளைப் பொறுக்க முடியாதவன்

வாக்குறுதிகளை நம்பி

போராட்டத்தைக் கைவிட்டவன்

மீண்டும் தொடங்குகிறான்

வாக்குறுதிகளின் முடை நாற்றம் தாங்காமல்

மூக்கைப் பொத்திக் கொள்கிறான்

அந்த அகோர அருவத்தைப்

பார்க்க விரும்பாமல்

கண்களை மூடிக் கொள்கிறான்

பிராணணையற்ற வார்த்தைகளைக் கேட்கும்

சொரணையற்ற செவிகளை அடைத்துக் கொள்கிறான்

நாவுக்குள் நுழையும் கசந்த சுவையை

நொடிக்கொரு தரம் காரி உமிழ்ந்து கொண்டிருக்கிறான்

வாக்குறுதிகள் அவனைச் சுற்றி

குவிந்து கொண்டிருக்கின்றன

எழுந்து ஓடத் துவங்கும்

அவனைத் துரத்திக் கொண்டு செல்கின்றன

மேலதிக வாக்குறுதிகள்

*****