சாவு வீட்டின் கிராக்கி

சாவு வீட்டின் கிராக்கி

இந்த வீட்டில்

கணவனின் வசைச் சொற்களின்

எரிச்சல் தாங்க முடியாமல்

ஒருத்தி தீக்குளித்து இருக்கிறாள்

வேலை கிடைக்காத

விரக்தியின் மனபாரம் தாங்க முடியாமல்

மேலே சுருக்கிடப்பட்ட கயிற்றில்

சுமையை இறக்கி வைத்து இருக்கிறான் ஒருவன்

தனியாக வாழ்ந்த விதவைப் பெண்ணொருத்தி

பலரோடு இணைத்துப் பேசப்பட்டதற்காக

தனிமையில் விஷமருந்தி

பொதுவெளியில் நாற்றம் கிளம்பி

பிணமாய் மீட்கப்பட்டு இருக்கிறாள்

கடன் தொல்லை தாங்க முடியாத

எலும்பும் சதையுமான

நாற்பத்தைந்து கிலோ எடைக்காரன்

கையறுத்துக் கொண்டு

சிவப்புக் கறை படிய

அறையெங்கும் உருண்டு புரண்டு இருக்கிறான்

குறைந்த வாடகைக்கு போகிறது என்று

வருத்தமாக இருக்கிறது வீட்டுக்காரருக்கு

செத்து விட்ட ஆத்மாக்கள்

வாடகைக் கொடுக்காமல்

அந்த வீட்டில் குடியிருப்பதாக

பேசிக் கொள்கிறார்கள் ஊர் மக்கள்

ஏற்கனவே செத்து விட்ட ஒருவன்

மறுபடியும் செத்தாலும் பரவாயில்லை என்று

குறைந்த வாடகையைக் கருத்தில் கொண்டு

குடியேறிக் கொண்டு இருக்கிறான்

சாவு வீடென அழைக்கப்பட்டாலும்

கிராக்கி இருக்கத்தான் செய்கிறது

*****