சடமாகிப் போன கிரகம்
நான்
நிறைய தவறுகளைச் செய்து இருப்பதாக
பிராது
செய்து கொண்டேன்
என்
மீதான காதலை
நிராகரிக்க
முடியாத விரக்தியில் அழத் துவங்கியவள்
பூனைக்குட்டியைப்
போல பதுங்கிப் பதுங்கிப் போனாள்
எவ்வளவு
தேடியும் அதன் பின்
வெந்நீரில்
போடப்பட்ட
பனிக்கட்டியைக்
கண்டறிய முடியவில்லை
மறுபடியும்
நான் தவறு செய்து விட்டதாக
பிராது
செய்து கொண்டேன்
தண்டிப்பதற்கோ,
மன்னிப்பதற்கோ
எந்தப்
பெண்ணுமில்லாத பெருவெளியில்
சடமென
ஒரு கிரகமாய்ச் சுழன்று கொண்டிருப்பதை
அறிந்தவர்கள்
அவளிடம் சொல்லுங்கள்
*****
No comments:
Post a Comment