உறை மேல் முகவரி

உறை மேல் முகவரி

கடைசித் தீப்பெட்டியின் கடைசித் தீக்குச்சி

காணாமல் போன பிறகு

இரண்டு சிகரெட்டுகள் அழிய முடியாத

ஆற்றாமையில் புதையுண்டுப் போயின

ஈராயிரம் ஆண்டுகளுக்குப் பின்

ஒரு தொல்பொருள் ஆய்வாளன் கையில் சிக்கிய

அவைகள் இரண்டும்

தங்களைக் கொழுத்தி அவனுடைய வாயில்

வைத்துக் கொள்ளுமாறு கெஞ்சின

பயந்து போன அவன்

தற்கொலைக்கு முயன்றதாக

வெண்சுருட்டுகள் இரண்டையும்

நீதிமன்றத்தில் ஒப்படைத்து விட்டு

ஓட்டம் பிடித்தான்

எரிந்துப் போக முடியாத

சிறை வாழ்க்கையை எண்ணி

அழ ஆரம்பித்தன இரண்டு சிகரெட்டுகளும்

எச்சமாய் எங்கோ காணாமல் போய்

ஒதுங்கிக் கிடந்து கண்டெடுக்கப்பட்ட

கடைசித் தீப்பெட்டியின் உறை

காயசித்திப் பெட்டகமா என்பது குறித்த

ஆய்வுகள் தொடங்கியிருந்தன

*****