ஆதி மண்ணின் முலைப்பாலைத் தொலைத்த மரம்

ஆதி மண்ணின் முலைப்பாலைத் தொலைத்த மரம்

மழைக்காலத் தட்டான்களைப் போல ஆன

உன் பால்ய காலத்தை

புத்தகங்களின் சிலுவையில் அறைந்து கொன்றோம்

படிக்கும் இயந்திரம் போல ஓயாமல் இறைந்து கொண்டு

நீ படித்துக் கொண்டிருந்தாய்

பல வகை நுழைவுத் தேர்வுகளின் வாதைகளில்

புற்றுக்குள் நுழையும் பாம்பு போல

புறப்பட்டு வந்தாய்

உன் ஆசை அபிலாஷைகளால் ஆன மரத்தின் வேர்கள்

சுதந்திரத்தைத் தேடியது

அந்தோ பார் ஒரு தொட்டிக்குள்

கொண்டை போட்ட தலைமயிரைப் போல் சுருட்டிக் கொண்டது

நீ வளர்ந்து விட்டாய் என் செல்ல மரமே

தொட்டியிலிருந்து உன்னைப் பெயர்த்து

அமெரிக்கா, ஆஸ்திரேலியா, துபாய் என்று

எங்கு வேண்டுமானாலும் நடலாம்

ஆதி மண்ணின் முலைப்பால் வாசனையை

தயவு செய்து இனி தேடாதே!

*****